Елордада жұмыс істейтін жастарды баспана алу мәселесінде қолдауға бағытталған «Елорда жастары» мемлекеттік бағдарламасы табысты жүзеге асып келеді. Бағдарламаға қатысушылардың бірі Ерке Байғабылова мемлекеттің бастамасының арқасында қалай баспаналы болғанын айтып берді, деп хабарлайды елорда әкімдігінің ресми сайты.

Ерке Астанада жұмыс істейді және бұрын жұмыс істейтін жастарға арналған жалға берілетін баспана бағдарламасына қатысып, бес жыл бойы мемлекет берген пәтерде тұрды. Айтуынша, дәл осы уақыт өз үйін сатып алуда маңызды рөл атқарған.

«Мен «Елорда жастары» бағдарламасы туралы «Отбасы» банкінің өкілдері арқылы білдім. Мені бірден оның шарттары қызықтырды – бар болғаны 10% бастапқы жарна және жылдық 5% төмен пайыздық мөлшерлеме. Бұл тиімді болды, - дейді Ерке.

Жалдау мерзімі аяқталған кезде ақшасын да жинап үлгерген. Айтуынша, бес жылда өз пәтерін сатып алудың қаржылық негізін қалауға көмектескен. Астана тұрғыны мүмкіндігін жіберіп алмай, құжат тапсыруды жөн көрді.

«Бағдарлама өте тиімді болды. Банк менеджерлерінің өтініш беруден бастап соңына дейінгі барлық кезеңде бізбен бірге болғаны ерекше қуантты. Бұл маған сенімділік беріп, бүкіл процесті айтарлықтай жеңілдетті», – дейді ол.

Қазір Ерке отбасымен бірге өз пәтерінде тұрып жатыр және «Елорда жастары» бағдарламасы көптеген жастарға маңызды қадам жасауға мүмкіндік береді деп есептейді.

«Елорда жастары» бағдарламасы 34 жасқа дейінгі жастарға жеңілдікпен несие беруді ұсынады. Несиенің максималды сомасы 20 млн теңгеге дейін, мөлшерлемесі – жылдық 5%, бастапқы жарнасы – 10%. Тұрғын үйді бастапқы және қайталама нарықта сатып алуға болады.